CASH BACK dasturi bo‘yicha mijozlarga bonuslar taqdim etish shartlari

Joriy etish davri: 23-sentyabr 2024 yildan boshlab.

Umumiy qoidalar:

• Mazkur shartlar «Cash Back» dasturida ishtirok etishning shartlari va tartibini belgilaydi. «Cash Back» dasturida ro‘yxatdan o‘tgan paytdan boshlab mijoz kompaniya bilan aloqaga kiradi, mazkur shartlarni to‘liq va shartsiz qabul qiladi, ularni bajarishga majbur bo‘ladi hamda ushbu shartlarga muvofiq ballar olish huquqiga ega bo‘ladi. Shartlar kompaniyaning veb-saytida va kompaniya ixtiyoriga ko‘ra boshqa manbalarda e’lon qilinadi.
• «Cash Back» dasturi O‘zbekiston Respublikasi hududidagi kompaniyaning barcha filiallarida amal qiladi. Filiallarning to‘liq manzillari kompaniya veb-sayti www.ekopen.uz da e’lon qilingan.
• «Cash Back» dasturi kompaniya tomonidan to‘liq bekor qilinmaguncha amal qiladi va shundan keyin bekor qilinadi.

Atamalar va ta’riflar:

• Kompaniya – O‘zbekiston Respublikasida plastik profil, furnitura va boshqa komponentlar ishlab chiqaruvchi va yetkazib beruvchi yuridik shaxs, ya’ni «Ekopen» MChJ, mazkur «Cash Back» dasturini boshqarish va rivojlantirish bo‘yicha mutlaq huquqlarga ega.
• Mijoz – Kompaniya mahsulotlarini belgilangan narxlarda sotib olgan va «Cash Back» dasturida ro‘yxatdan o‘tgan yuridik yoki jismoniy shaxs (cexovik).
• Cash Back dasturi – mijoz kompaniya mahsulotlarini sotib olish orqali ushbu qoidalarga muvofiq Ballar olish huquqiga ega bo‘lgan munosabatlar.
• Kontakt ma’lumotlari – mijoz tomonidan dasturga ro‘yxatdan o‘tish paytida kiritilgan yoki kompaniya hisob tizimiga kiritilgan ma’lumotlar.
• Ballar – mijozning bonus hisobiga kompaniya mahsulotlarini sotib olish orqali hisoblangan hisob birligi. Ushbu Ballar kompaniya mahsulotlarini xarid qilishda chegirma sifatida foydalanilishi mumkin.
• Bonus hisob – mijozning dasturda ro‘yxatdan o‘tishi bilan kompaniya tomonidan kompaniyaning ma’lumotlar tizimida ochiladigan hisob raqam. Hisob Ballarda yuritiladi va hisob raqam mijozning telefon raqamiga yoki telegram hisobiga bog‘lanadi.
• Kirish chegarasi – dastur ishga tushgan vaqtdan boshlab mijoz tomonidan amalga oshirilgan dastlabki xaridlar summasi, ushbu summa oshirilgandan keyin ballar hisoblanadi.
• Kompaniya Call-markazi (Call-markaz) – mijozlarni qo‘llab-quvvatlash markazi, quyidagi telefonlar orqali ma’lumot berish xizmatini amalga oshiradi: 78 120 120 0, (93) 381 11 81 va telegram bot: @ekopenuzbot orqali.
• Xabarnoma – mijozga SMS yoki telegram orqali yuborilgan xabarlar, shu jumladan reklama xabarlar.
• Aksiya – «Cash Back» dasturi doirasida kompaniya tomonidan tashkil etilgan targ‘ibot yoki boshqa tadbirlar.

Cash Back dasturi tavsifi:

• Kompaniya mahsulotlarini belgilangan narxlarda sotib olgan har qanday mijoz dastur ishtirokchisiga aylanadi.
• Dasturda qatnashish uchun mijoz kompaniya mahsulotlarini sotib olishi va telegram bot @Ekopen_CashBack_Bot da ro‘yxatdan o‘tishi yoki kompaniya filiallaridan biridagi xodimlar orqali ro‘yxatdan o‘tishi lozim.
• «Cash Back» dasturida ro‘yxatdan o‘tish, mijozning dastur shartlariga roziligini bildiradi.
• Ballar kompaniyaning istalgan filialida amalga oshirilgan sotib olishlar va naqd, bank kartasi yoki o‘tkazish orqali to‘lovlar uchun hisoblanadi.
• Kompaniya o‘z xohishiga ko‘ra ballar miqdorini belgilaydi va ushbu ballarni o‘zgartirish huquqiga ega. Agar dastur shartlari o’zgarsa, kompaniya ushbu o’zgarishlar kuchga kirishidan 30 kalendar kun oldin mijozlarni xabardor qiladi.
• Har safar ballar hisoblanganida mijozlar SMS yoki telegram orqali xabar olishadi.

Ballar hisoblanish shartlari:

• Har bir xarid uchun: rangli plastik profillar (Life, Forward, Elite, Prime seriyalari) uchun mijoz har 100% to‘lov amalga oshirilganida bonus hisobiga xarid summasining 30% miqdorida ball oladi.
• Chegirma yoki boshqa imtiyozlarga ega yirik dasturchilar va boshqa hamkorlar sodiqlik dasturi ishtirokchilari boʻla olmaydi.
• Yuqoridagi profillarni sotib olgan dilerlar dasturda ishtirok etishlari mumkin. Shu bilan birga, ular rangli profillarni sotishda o’z mijozlariga tegishli Cash Back taqdim etish majburiyatini oladilar.
• Maxsus aksiya: ba’zi mahsulotlar aksiyalar davrida dasturdan chiqarilishi mumkin.
• To‘liq to‘lov: ballar faqat to‘liq to‘lov amalga oshirilgan va mijozning qarzdorligi bo‘lmagan holda hisoblanadi.

Ballarni mahsulotga almashtirish shartlari:

• Ballar kompaniya mahsulotlariga (aldoks seriyasi profillari bundan mustasno) almashtiriladi. 2024 yil 1 dekabrdan boshlab Cash Back dasturi bo’yicha to’plangan ballarni faqat rangli PVX profillar va bir tomonlama laminatsiyalangan profillarga almashtirish mumkin!
• Ballarni ular hisoblangan kundan boshlab keyingi oyning 1-sanasidan ertaroq almashtirib bo’lmaydi.
• Qarzdor mijozlar ballarni almashtirish imkoniga ega emas. Ballarni faqat qarzdorlik to‘langandan keyin almashtirish mumkin.
• Ballar muddatsiz amal qiladi.